Álemdik geosaıasat qubylyp tur. Qarjy naryǵynda da turaqtylyq baıqalmaıdy. Munaı baǵasy arzandap, jahan beımaza kúı keshe bastady. Daǵdarys eki ókpeden qysyp, dúnıeniń damý jolyn basqa arnaǵa qaraı buryp jiberdi. Osyndaı syn saǵatynda memlekettiń myqtylyǵy synalmaq. Sondyqtan, alda bolatyn qıyndyqtarǵa búginnen qam jasap, naqty qadamdarǵa barmasa bolmaıdy. Úkimettiń keńeıtilgen otyrysynda Elbasy eldegi keleli máselelerdi qozǵady. Qıyn-qystaý kezeńde bos ysyrapshyldyqqa barmaı, halyqty taryqtyryp almaı, qaıta budan paıdamen shyǵý kerektigin aıtty.
Bıylǵy respýblıkalyq bıýdjettiń on paıyzǵa qysqarýy daǵdarysty eńserýge jasalǵan alǵashqy qadam dep bilemiz. Sebebi, qazynanyń qarjysyn eseppen jaratyp, qajetti problemalardy sheshýge jumsamasa, onda erteń barmaq tistep qalýymyz múmkin. Sondyqtan bıýdjetten bólinetin árbir teńgeni maqsatty túrde shyǵyndaý qajet. «Degenmen, memlekettiń halyq aldynda moınyna alǵan áleýmettik jaýapkershiligi óz kóleminde ótelýi kerek»,– dedi Elbasy. Bul memleket tarapynan beriletin túrli áleýmettik kómekter qysqarmaıdy, burynǵy kólemde tólene beredi degen sóz. Memleket basshysy buǵan deıin daǵdarys kezindegi qıynshylyq halyqtyń esebinen sheshilmeıtinin aıtqan. Keshegi Úkimetke bergen tapsyrmasy sol sózdiń oryndalýy edi.
Bilim berý, densaýlyq saqtaý salalaryna bólinetin qarjynyń da kólemi qysqarmaıdy. Qaıta «Balapan» baǵdarlamasyn odan ári jalǵastyrý tapsyryldy. Halyqtyń densaýlyǵy men bilimine quıylǵan qarjy, memlekettiń bolashaqtaǵy ekonomıkalyq ahýalyn qalyptastyrmaq. Sol sebepti, Elbasy bul tarapta bastalǵan jumystardyń jalǵasý kerektigin eskertti.
Daǵdarys kezinde jańa jobalardyń bastalmaıtyny belgili. Deı turǵanmen, buǵan deıin qolǵa alynǵan jumystyń bári aıaqtalady. Ol úshin memleket barlyq jaǵdaıdy jasap, Ulttyq qordan qajetti qarjyny berip otyr. Osy rette, Elbasy qarjyny ońtaıly jumsaýdy, árbir tıynnyń esepte bolýyn, ony qatań qadaǵalaýdy tapsyrdy.
– Tikeleı meniń bastamammen qurylǵan komıssııa qarjynyń maqsatty túrde jumsalýyn qadaǵalap, barlyq nátıjeni ózime baıandap otyratyn bolady. Ákimderge úlken jaýapkershilik júkteledi. «Nur Otan» partııasy da bul iske belsene aralasyp, partııalyq qadaǵalaý ornatýy kerek. Eshqandaı artyq shyǵyn bolmaýy qajet. Bıýdjettiń esebinen jasalatyn mereıtoılar men túrli sharalardy qysqartýdy Úkimetke tapsyramyn, – dedi Elbasy.
Keńeıtilgen keńes barysynda Memleket basshysy bolashaq baǵytymyzdy, atqaratyn naqty jumystar men mindetterdi aıqyndap berdi. Jasalǵan baǵdarlama bar. Ony iske asyratyn qarjy da jetkilikti. Endi árbir qazaqstandyq azamattyń ortaq iske jumylyp, janashyrlyqpen jumys isteýi ǵana qalyp tur.
Naýryzbaı BAIQADAMOV,
«Nur Otan» partııasy Qyzylorda oblystyq fılıaly tóraǵasynyń birinshi orynbasary.
QYZYLORDA.